कार्तिक १९, २०८२ / 2025-11-04
भियतनाम । भियतनामको हालोङ खाडीमा आँधीबेहरीका कारण डुंगा पल्टिँदा ३७ जनाको ज्यान गएको छ । डुंगामा ४८ यात्रु र ५ जना चालक दलका सदस्य थिए ।
डुंगा स्थानीय समयअनुसार शनिबार दिउँसो २ बजेतिर पल्टिएको हो । त्यसबेला तीव्र हावा, भारी वर्षा र चट्याङ परेको अन्तर्राष्ट्रिय सञ्चारमाध्यमहरुले जनाएका छन् । बेपत्ताहरूको रातभर खोजीकार्य जारी राखिएको थियो । उद्धार टोलीले १२ जनालाई जीवितै उद्धार गरेको छ ।
राष्ट्रिय मौसम पूर्वानुमानअनुसार विफा आँधी अर्को साता भियतनामको हा लङ बेको तटसहित उत्तरी क्षेत्र पुग्ने अनुमान गरिएको छ । हालोङ खाडी भियतनामको सबैभन्दा लोकप्रिय पर्यटकीय गन्तव्यमध्ये एक हो । यहाँ बर्सेनि लाखौं मानिस पुग्ने गरेका छन् ।
गत वर्ष पनि ठूलो आँधीका कारण खाडीको तटीय क्वाङ निन्ह प्रान्तमा ३० वटा डुंगा डुबेका थिए ।
